Af raunvisindum …

Konur velja varkára karla

Ungir karlmenn, sem halda að leiðin að hjarta konunnar sé að aka hratt eða fara í teygjustökk, vaða í villu og svima og ættu heldur að byrja að huga að viðbótarlífeyrissparnaði. Ný rannsókn sýnir nefnilega, að stúlkur kjósa frekar karlmenn sem fara að öllu með gát.

Þessi niðurstaða stríðir gegn þeirri kenningu, að karlar sem sýna styrk og hugrekki séu að sýna fram á að þeir séu vel úr garði gerðir og því heppilegir makar. Sú kenning passar vel við þá staðreynd, að ungir karlmenn taka almennt meiri áhættu en þeir sem orðnir eru eldri.

En vísindamenn hjá háskólanum í Maine í Bandaríkjunum gerði könnun með þátttöku 48 ungra karlmanna og 52 ungra kvenna þar sem niðurstaðan var að konur kusu frekar varkára karla.

„Karlarnir héldu að konur yrðu hrifnar af glannaskap en konurnar vildu frekar varkára menn," segir í grein, sem vísindamennirnir skrifa í tímaritið Science. „Þeir einu, sem urðu hrifnir, voru aðrir karlmenn."

Sé það tilfellið gæti önnur kenning skýrt þá þversögn sem niðurstaða könnunarinnar virðist leiða í ljós: Með því að taka áhættu, og öðlast þannig aðdáun annarra karlmanna, hækki þjóðfélagsleg staða þess sem áhættuna tekur og það kunni að hafa jákvæð áhrif á konur.

– mbl.is.

---

Sýndi tvö myndbönd í kvöld á tónleikum … annað vakti takmarkaða hrifningu, hitt enga. Mér stóð nokk á sama … en þetta var dáldið fyndið … seinna myndbandið hélt athygli áhorfenda svo illa að enginn virtist taka eftir því að það kláraðist. Þó er í því hárbeitt og meinfyndin samfélagsádeila … svín og perlur, ha?

Hm … Róm, Berlín, Reykjavík … hm … hvar er best að búa? Ég fór á vinnumiðlun í dag vegna næturvarðarstarfs sem reyndist þegar vera skipað, en þegar ég sagði vinnumiðlaranum að ég myndi síðar meir leita að starfi í Róm taldi hann upp af skjánum sinum störf á Spáni og Kýpur … Nei, Róm, endurtók ég, ég er ekki að fara hvert sem er, ég er að fara til Rómar. Já, hér er eitthvað í Marseille, hélt hann áfram. Stórmerkilegt. Er samsvörun á milli hans og áhorfenda minna í kvöld? Á ég að læra eitthvað af þessu?

Rómirómi … I roam, therefore I am.