Mótmælum framkomu við hælisleitendur í Njarðvík 14:00

Boðað er til mótmæla fyrir utan lögreglustöðina í Njarðvík, kl. 14 í dag, föstudag 12. september, vegna framkomu lögregluyfirvalda við fólk sem leitar hér hælis. Engin samtök efna til mótmælanna en ég er meðal þeirra sem ætla að mæta og tók að mér að senda ykkur fréttatilkynningu. Í henni eru drög að yfirlýsingu sem lesin verður á fundinum, og spurningar sem beint er að lögreglu og dómsmálayfirvöldum.

Sumar spurninganna snúa beint að aðgerðunum í gær, þegar 58 lögreglumenn og sérsveitarmenn tóku þátt í „rassíu" inn á staðina þar sem hælisleitendur eru hýstir á meðan þeir bíða synjunar umsókna sinna. Aðrar snúast um meðferð mála hælisleitenda almennt.

Í meðfylgjandi drögum að fréttatilkynningu eru líka drög að yfirlýsingu sem lesin verður á staðnum.

Mótmælin verða við lögreglustöðina í Njarðvík kl. 14 í dag, föstudag.

Mótmælin eru ekki skipulögð af neinum tilteknum hópi, þau eru sjálfsprottin.

Vitaskuld verða þau friðsamleg af hálfu mótmælenda.

Ég hvet ykkur öll til að koma, alla þá sem komast frá vinnu eða öðrum verkum.

Fréttatilkynningin fylgir.


---

Fréttatilkynning:


Mótmæli


Boðað er til mótmælasamkomu fyrir utan Lögreglustöðina í Njarðvík í dag, föstudaginn 12. september, klukkan 14:00, til að mótmæla meðferð hælisleitenda á Íslandi og krefja lögregluna svara um aðgerð gærdagsins.


Við krefjumst þess að allir hælisleitendur á Íslandi fái sömu meðferð og væru þeir ráðherradætur, ráðherrasynir.


Til lögregluyfirvalda beinum við þessum spurningum:

Hvaða framkoma við hælisleitendur krafðist 58 lögreglumanna gegn 40? Hvaða aðstæður kröfðust aðkomu sérsveitarmanna?

Hvaða vopn báru sérsveitarmenn við aðgerðirnar, var þeim beitt, og hvaða tilefni þótti þá til þess?

Margir voru handjárnaðir við aðgerðirnar, að sögn lögreglu. Hversu margir, af hvaða tilefni og hversu lengi? Voru þeir handteknir? Verða þeir kærðir?

Hvaða lagaheimildir lágu að baki aðgerðinni? Ræðst lögmæti hennar af því hvaða gögn komu í leitirnar og hvaða upplýsingar þau geyma? Ef svo er, hvaða gögn voru það og hvernig er mikilvægi þeirra metið?

Voru allir hælisleitendur beittir sömu meðferð, en ekki aðeins þeir grunuðu?

Gerði lögreglan lögmætar eigur hælisleitenda upptækar? Eða er sannað að þetta hafi verið þýfi og/eða ólögmætar tekjur? Eru lagaheimildir lögreglunnar til þessarar aðgerðar skýrar?

Var brotið á viðurkenndum mannréttindum og lýðréttindum hælisleitenda í aðgerðinni – friðhelgi einkalífs, réttinum til réttlátrar málsmeðferðar?


Dómsmálaráðuneytið spyrjum við:

Er það satt að eftir mánaða eða ára bið í algjörri óvissu frétti hælisleitendur á Íslandi af brottvikningu sinni með 10-15 mínútna fyrirvara, áður en þeir eru fluttir á Leifsstöð?

Starfar Útlendingastofnun út frá óskrifuðum reglum um meðferð fólks á grundvelli kynþáttar, upprunalands og/eða fjárhags og stéttar?

Er réttarstaða hælisleitenda og annarra útlendinga sem hingað koma tryggð með lögum og varin með eftirlitsstofnunum? Eða hafa lögregluyfirvöld frjálsar hendur gagnvart þessu fólki? Ráða duttlungar för í meðferð þess?

---

Tekið skal fram að svona samkoma er lögmæt. Á Íslandi er rétturinn til að koma saman til mótmæla ekki háður leyfisveitingum.

Kosta allar íbúðir yfir 100 þúsund/mán?

Við spúsa mín erum að leita að íbúð í Reykjavík fyrir veturinn. Við hummuðum fram af okkur tilboð upp á 100 þúsund króna leigu, því okkur þótti það vera yfir strikið - en nú benda menn mér á 130 til 150 þúsund króna íbúðir, sem fínan díl. Í fúlustu alvöru.

Við erum að tala um íbúð fyrir tvennt, karl og konu, sem vilja helst vera án bíls og þannig nálægt miðbæ og háskóla.

Ég hummaði víst burt íbúð á 80 þúsund, vegna þess að mér fannst hún ívið of pen.

Ef einhver getur gefið ábendingu um heppilega íbúð á sanngjarnri leigu væri gaman að heyra af henni. Við lofum að leggja okkur fram um að skrifa góðar bækur í íbúðinni.

H+B.

Drepum ekki manninn

Kæru vinir,

sendið bréfin hér að neðan til utanríkisráðherra og dómsmálaráðherra, eða önnur eins. Þetta getur ekki gerst, en það virðist eiga að gerast strax í bítið.

---

bjb (hjá) althingi.is, bjorn (hjá) centrum.is

Ágæti Björn Bjarnason,

ég vil höfða til mannúðar þinnar og biðja þig að gera það sem þú getur til að koma í veg fyrir að Paul Ramses Oduor verði sendur frá Íslandi, þegar hann hefur leitað skjóls hér frá yfirvofandi dauða í heimalandi sínu, Kenýa. Hann segist vera á aftökulista ríkisstjórnar þar, og engin ástæða virðist til að rengja það.

Að senda málið til afgreiðslu í öðru landi, vegna þess að það er heimilt, þegar kona hans og nýfætt barn verða eftir hér, er í besta falli ómannúðlegt.

Mér og mörgum öðrum blöskrar.

Með innilegri von um skjót viðbrögð, þó fyrirvarinn sé hrikalega stuttur,

NAFN MITT.

---

isg (hjá) althingi.is

Kæra Ingibjörg Sólrún Gísladóttir,

ég vil höfða til mannúðar þinnar og biðja þig að gera það sem þú getur til að koma í veg fyrir að Paul Ramses Oduor verði sendur frá Íslandi, þegar hann hefur leitað skjóls hér frá yfirvofandi dauða í heimalandi sínu, Kenýa. Hann segist vera á aftökulista ríkisstjórnar þar, og engin ástæða virðist til að rengja það.

Að senda málið til afgreiðslu í öðru landi, vegna þess að það er heimilt, þegar kona hans og nýfætt barn verða eftir hér, er í besta falli ómannúðlegt.

Mér og mörgum öðrum blöskrar.

Með innilegri von um skjót viðbrögð, þó fyrirvarinn sé hrikalega stuttur,

NAFN MITT.

Er hægt að gera eitthvað til að þessi maður deyi ekki?

Þetta er ekki hægt:

Íslendingar stía sundur hjónum og barni til að senda manninn í opinn dauðann, enda er hann frá Kenýa.

Ingibjörg Sólrún? Stefán Pálsson? Hver kemst?

Á Íslandi er rekin rasísk stefna í málefnum útlendinga og hefur verið allt frá því stjórnvöld lögðu fram þá einu kröfu til bandaríska hersins að hingað kæmu engir svertingjar. Sem stóð fram á 8. áratuginn, þegar málið varð skandall í bandarískum fjölmiðlum. Valur Ingimundarson hefur rakið þetta.

Umsóknir fólks frá Afríku um ferðamannaleyfi til Íslands daga uppi í kerfinu, en í dag vísa yfirvöld á skandinavísku sendiráðin í viðkomandi löndum, sem taki við umsóknunum, og afgreiðslu Schengen. Ábyrgðin er out-sourcuð, eins og virðist stefna nýrrar aldar.

Allt um það, geymum stærra samhengi – er hægt að gera eitthvað til að þessi maður deyi ekki? Til að við drepum hann ekki?

Sósíalismi (hjarta) allir

Hjart hjart hjart
eins og blómspringablóm.

Framundan er trúlega nokkur yfirlýsingagleði.

Í tilefni af þrítugsafmæli mínu er ég kominn út úr skápnum sem sósíalisti og listamaður. Mér sýnist enginn annar ætla að gera þetta fyrir mig. Ég flyt mig á this.is/haukurmar þar sem ég geri ráð fyrir að henda í nokkrar sósíalískar yfirlýsingar. Svo koma bækur. En sósíalistum hættir til að ofanda - við skulum anda rólega.

Fágúgl dagsins

Avant garde poetry post-lyricism. Fjórar niðurstöður. Post-lyricism: 20. Póst-lýrískur: Enginn fyrr en núna.

Gúgla, gaugl, guglum, goglt. Þótt ég gygldi alla leyndardóma og alla þekking væri ég án kærleikans aðeins hljómandi málmur eða hvellandi bjalla.

Blogga, blag, blágum, blogt. Þótt blægði ég tungum manna og engla en hefði ekki kærleika væri ég ekki neitt. Barekki neitt.