Þegar upp er staðið … hm … ekki að mér sé til setunnar boðið … þetta er í fréttum helst: Það virðist vera, þó enn hafi samningar ekki verið undirritaðir, að mér hafi nú hér um bil tekist ætlunarverk mitt með Íslandsferð minni, þó það hafi tekið heldur lengri tíma en ég ætlaði: semsagt að finna peninga og jafnvel, að einhverju leyti, að finna sjálfan mig. Já, maður finnur ekki sjálfan sig í útlöndum, maður týnir sér, svo kemur maður heim og finnur sig aftur og pendúlar þannig fram og til baka til að verða ríkari í sálinni og líkamanum …
Og semsagt, nú er ég bæði staðsettur í hinu félagslega neti, ég er með annan fótinn í megahíerarkíu heimsins, sem rísómast á milli Björgólfanna, akademíunnar, rithöfundanna, þriðja heimsins og mín, ég er að fara að gera eitthvað og ég mun fá greitt fyrir það … ég gengst við kennitölu minni, kalli einhver xxxxxx-xxxx svara ég: já! Það er ég! Og glotti ekki einu sinni.
Og þá verður til þessi nýi vandi … eða gamall vandi tekur á sig nýja mynd … því löngunin lætur mann ekki í friði. Mér finnst þessi óunnu verk sem ég hef tekið á mínar herðar eða í laptoppinn vera þegar afstaðin, því útlit er fyrir að þau verði það – veðurspáin segir að sólin komi upp í fyrramálið svo sólinni finnst hún geti slappað af og þurfi ekki að hringsóla meir. Sem, að því leyti sem jörðin snýst um sjálfa sig, er náttúrulega rétt …
Ég skelli því á netið sem ég hef verið að viðra við fólk að Björgólfur yngri dansaði breakdans á Sirkús um helgina, það var á föstudagskvöldið en á laugardaginn heyrðist af þeim feðgum báðum stígandi örfá spor á Kaffitári. Nálægð þeirra er af sama toga og nálægð prinsa í ævintýrum … já, mér fannst ég ekki 2000-strákur heldur 1000-strákur í drykkjuskúrnum þegar ég heyrði sjálfan mig pískra að fólki að prinsinn væri kominn … og það voru ekki stelpurnar sem vildu hrifsa hann heldur strákarnir, sem allir fóru að flissa yfir fyrirtækjunum sem þá langaði að stofna með honum en myndu aldrei þora að nefna.
Engin ummæli:
Skrifa ummæli