Ferðamaður

Gott og vel, úff … nú hef ég ekkert birt lengi. Fyrst: Velkomin í nýja lúkkið. Þetta er allt miklu betra, þykir mér. Og þó að myndin af mér sé mæðuleg þá er hún töff og jafnvel dáldið sönn. Þarna er jafnvel komið fram ákveðið lykilatriði: hömlulaus sjálfsvorkunn asnans.

Þess utan: Mikið getur þetta ár orðið gott! Svona fyrir einstaka manneskjur, þó heimsbyggðin fari til fjandans. Árið hófst í Svíþjóð, hérna:

– og raunar er það ekki alveg satt, fyrstu daga nýja ársins var ég á Álandseyjum, sem samkvæmt úrskurði Sameinuðu Þjóðanna eru finnskar. Í Svíþjóð, í öllu falli, lagði ég línur ársins 2006 … með Halldorion, vini mínum. Línurnar felast, nánar tiltekið, í tíu kvikmyndum og einni bók. Fyrsta kvikmyndin er tilbúin. Bókin er að skrifa sig. Yfirlýsingagleði er þörf. Bókin er geðveik.

Ef ég dugi ekki þá drepst ég: ég er að fara að gera heimildamynd. Ég sit við skrifborðið mitt á Vesturgötu og er að fara að gera heimildamynd. Sit. Einhverjir þröskuldar eru enn á milli mín og þeirrar tegundar framkvæmdagleði sem krefst þess að maður standi upp frá borðum og geri tiltekna hluti með tilteknu fólki á tilteknum tíma. Sömu þröskuldar held ég að standi á milli mín og fjármuna. Þeir sem hafa ábendingar um hvernig maður getur yfirstigið slíka persónuleikabresti mega gjarna vera í bandi.

Ég ætla bara að tala um sjálfan mig á þessu bloggi, héðan af … skrif um annað verða seld Fréttablaðinu og Múrnum fyrir morð fjár. Það er góður peningur í andófsbransanum, mótmælendurnir á Kárahnjúkum voru víst með 250 þúsund á mánuði.

Hér er þá ein mynd enn: lógóið sem Danni vinur minn gerði fyrir tíu mynda seríuna – íslenska heitið Ferðamaður, útlenska Voyageur. Þetta leit vel út og hljómaði rétt eina kvöldstund en svo óttast ég að það sé tilgerð í þessu … minni kannski ef maður segir voyager. Lógóið á fyrst og fremst að vera hattur, en tvíræður hattur þó. Álit á þessu líka vel þegin. Virkjum alþýðuna, virkjum fallvötnin.

CV - Haukur Mar

CV
Haukur Már Helgason
b. 1978 | 2381km@gmail.com

---

SELECTED WRITINGS

2005 Rispa Jeppa – prose collection
Publ. Nýhil, in the collection Nordic literature.
2005 „Önnur Másabók“ – 2nd part of a rhapsody
Appeared in the collection Ást æða varps. Publ. Nýhil. Ed. Ófeigur Sigurðsson & HMH.
2002–2003 We Are Water – radio play for the BBC World
Co-author of a 60 min. piece for The Royal Court Theatre in London. Premiered on BBC-World, March 29, 2003.
2003 Sókratesarfélagið – play
Premiered by the theatre group Living Theatre, in Reykjavík, August 16, 2003.
2003 2004 – book of poetry
64 pages. Publ. Nýhil.
2002 Untitled monologue for Iceland State TV (RÚV)
Director: Lárus Ýmir Óskarsson. Premiered 2006.
2001 „Fyrsta Másabók“ – 1st part of a rhapsody
Appeared in the anthology Ljóð ungra skálda 2001. Publ. Mál og menning.
2000 Eini strákurinn í heiminum sem kunni að telja – book of poetry
42 pages. Publ. author.

---

EDITING etc.

2005-2006 Editing of catalogue for gallery Klink&bank
2004–2005 Writer and journalist for Reykjavík Grapevine magazine
2004 Editor and film festival correspondant for Land & synir magazine
2003 Af stríði – essay collection on the war in Iraq
132 pages. Editor and writer of introduction. The first in Nýhil's Af-series. Publ. Nýhil.
2003 Heimsendapestir, book of poetry by Eiríkur Örn Norðdahl
64 bls. Editor. Publ. Nýhil.
2001–2002 Berlin culture correspondant for State Radio 1
Summer 2001 Journalist at newspaper Morgunblaðið
2001 Nýhil
Co-founder of Nýhil, collective and publishing house. Among other things, some 15 titles have been published under the label, by now generally considered the most noteworthy publisher of new Icelandic literature.
2000-2001 Editing of the University of Iceland's Science Web
Editor of humanities.
1999 25 lexíur í upplýsingatækni for secondary and grammar school
Co-author. Two text-books on Information Technology.
Publ. Námsgagnastofnun (the state-run publisher of paedagogic material).

---

TRANSLATIONS

2005 The Plague of Fantasies – book by philosopher Slavoj Zizek
A current undertaking. Will be published by Iceland's oldest running publishing company, Hið íslesnska bókmenntafélag.
2002–2004 Translations for philosophy periodical Hugur
Maurizio Ferraris „Phenomenology and the Messiah“, 2005. Italian.
Sara Heinämaa „Descartes and the Unity of Soul and Body“, 2005.
Slavoj Zizek, „Kant with (or against) Sade“, 2004.
Minna Koivuniemi, „In the Spiderweb – Spinoza on Affects“, 2004.
Guðfríður Lilja Grétarsdóttir „The limits of Logic“, 2004.
Bernard Williams, „Philosophy as a humanistic discipline“, 2003.
Teresa Orozco, „The art of insinuation – Gadamer's philosophical appearance in the Third Reich“, 2003. German.
Hans Georg Gadamer, „Man and Language“, 2002. German.
2003–2004 Translations for Nýhil's Af-series
Slavoj Zizek, „The Ongoing Soft Revolution“, Af okkur, Nýhil 2004.
Slavoj Zizek, „The Iraq War – where lies the real danger?“, Af stríði, Nýhil 2003.
Arundhati Roy „Instant-mix Imperial Democracy!“, Af stríði, Nýhil 2003.

---

SELECTED FILMS & VIDEOS

2006 Papagena – Voyager 1
Author. The first in a planned series of ten documentaries on the obscurity of desire. 16 min.
2003 Áróður – Propaganda
Writer/director. Premiered in Festival Shorts&Docs, Reykjavík 2004. 13 min.
2002 Annað fólk – Andere Leute – Altre Gente – Other People
Writer/director. A short film made in three different versions, where poetry of three different authors is employed as musical score.
Poets: Veronica Raimo, Italy; Reto Pulfer, Switzerland, and HMH. 12 min.
2001 Homo activitus
Writer/director. Comedy on nihilism. 7 min.
2001 In the Trenches – short film about a priest
Writer/director. 15 min. Awarded. Bought and shown on State TV.
2000 Vei! Hryðjuverk! – Yibbie! Terrorism! – TV film
Writer. Produced by Böðvar Bjarki Pétursson for State TV. 25 min.

---

HAPPENINGS

2006 Kviksaga – the Reykjavík Academy's documentary film center
Founding member of Kviksaga. The center produces, screens and gives courses on documentary filmmaking.
2005 La dolce fucking vita in Berlin Expo, Germany
Poetry happening on art fair Berlin Expo. A joint project with gallery Klink&bank.
2005 La dolce vita in Lys over Lålland, Denmark
Poetry happening in in co-operation with gallery Klink&bank.
Summer 2003 Poetry parties – touring Iceland
Nýhil toured Iceland giving readings and throwing parties 5. til 24 júlí 2003.
2002-2003 Nýhilkvöld – Neuhil Abend
The first Nýhil happenings took place in Berlin, 2002, organized by Eiríkur Örn Norðdahl and HMH. Among appearances were the members of Icelandic group múm.
2000 Spakstundir, philosophical happenings
Open discussioins of philosophical matters, that I planned and started as head of Soffía, The University of Iceland's Philosophy Students Club. They are still held monthly, in Reykjavík.

---

TEACHING

2005-2006 Associate Professor, Iceland Acadamy of the Arts
Courses: Útópía/Alkemía and Political Visuality, design department.
2005-2006 Part-time teacher at Iceland Film School
First year Film-analysis.
Spring 2001 Assistant to Prof. Erlendur Jónsson, University of Iceland
Spring 2000 Kindergarten Instructor, Tjarnarborg, Reykjavík.
1998–1999 Secondary School Instructor, Ísafjörður.
1998 Director in Teenage Drama Club, Ísafjörður.
Staged: Grease, the musical.

---

EDUCATION

2003–2004 Cinema Studies, at FAMU, Prague Arts Academy
Emphasis: Screenwriting. Instructors included: Jean-Claude Carrière, J. Sofr, Brendan Ward, Linda Aronson, Pavel Jech, M. Bregant, Vojtechosvský and Barbara Ericsson.
2003 Kurz&Gelb, course in film directing at UdK, the Berlin Arts Academy
Instructors: Edward Berger og Lars Kraume.
1999–2003 Graduated in Philosophy from The University of Iceland
2001-2002 Exchange studies at Humboldt and Tächnische Universities, Berlín
– two semesters, supported by the Erasmus programme.
2002 Attended the congress Espaces d'action – espaces de perception
at Université de Technologie, Compiègne, France. Funded by the Socrates programme.
2001 Attended the congress Cognitive Science and Philosophy
at Brighton University, UK. Funded by the Socrates programme.
1998 University Admission Exams at Menntaskólinn við Hamrahlíð
Physics major.

---

LANGUAGES

Fluent: German, English, Icelandic.
Limited: French and Danish.
Can read: Italian and the Nordic languages.

Ferilskra

Ferilskrá
Haukur Már Helgason
f. 1978 | 2381km@gmail.com

---

HELSTU RITSTÖRF

• 2005 Rispa Jeppa – prósasafn
  Útg. Nýhil, í ritröðinni Norrænar bókmenntir.
  
• 2005 „Önnur Másabók“ – ljóðabálkur
  Birtist í safninu Ást æða varps. Útg. Nýhil. Ritstj. Ófeigur Sigurðsson og HMH.
  
• 2002–2003 We Are Water – útvarpsleikrit fyrir BBC World
  Meðhöfundur 60 mín. verks fyrir Royal Court Theatre í London. Frumflutningur fór fram á BBC-World útvarpsstöðinni, 29. mars, 2003.
  
• 2003 Sókratesarfélagið – leikrit
  Höfundur. Frumflutt af leikhópnum Lifandi Leikhús í Iðnó, á menningarnótt 16. ágúst 2003.
  
• 2003 2004 – ljóðabók
  Höfundur. 64 bls. Útg. Nýhil.
  
• 2002 Eintal, án titils, fyrir RÚV sjónvarp
  Höfundur. Leikstýrt og framleitt af Lárusi Ými Óskarssyni fyrir RÚV. Frumsýnt 2006.
  
• 2001 „Fyrsta Másabók“ – ljóðabálkur
  Birtur í safnritinu Ljóð ungra skálda 2001. Ritstj.: Sölvi Björn Sigurðsson, útg. Mál og menning.
  
• 2000 Eini strákurinn í heiminum sem kunni að telja – ljóðabók
  Höfundur. 42 bls. Útgefið af höfundi.
  

---

RITSTJÓRNARVINNA

• 2005-2006 Ritstjórn katalógs fyrir Klink&bank
  
• 2004–2005 Blaðamaður og pistlahöfundur fyrir tímaritið Reykjavík Grapevine
  
• 2004 Ritstjórnarmeðlimur og pistlahöfundur fyrir fagritið Land & syni
  
• 2003 Af stríði – ritgerðasafn um Íraksstríðið
  132 bls. Ritstjóri og höfundur inngangs. Útg. Nýhil.
  
• 2003 Heimsendapestir, ljóðabók eftir Eirík Örn Norðdahl
  Ritstjóri. 64 bls. Útg. Nýhil.
  
• 2001–2002 Pistlahöfundur fyrir þáttinn Víðsjá á Rás 1
  Sumar 2001 Blaðamaður við Morgunblaðið
  
• 2001 Nýhil
  Félagsskapurinn Nýhil var stofnaður af Hauki og Eiríki Erni Norðdahl. Nýhil telur nú um 18 unga listamenn og skáld og undir merkjum Nýhils hafa verið gefnir út um 15 titlar ljóðabóka og annarra ritverka.
  
• 2000-2001 Ritstjórnarmeðlimur Vísindavefs HÍ
  Ritstjórn hugvísinda.
  
• 1999 25 lexíur í upplýsingatækni fyrir miðstig og unglingastig
  Annar tveggja höfunda. Tvær kennslubækur ásamt kennsluleiðbeiningum.
  Útg. Námsgagnastofnun.
  

---

ÞÝÐINGAR

• 2005 The Plague of Fantasies – Óraplágan - eftir heimspekinginn Slavoj Zizek
  Er í vinnslu. Mun koma út í Lærdómsritaröð Hins íslenska bókmenntafélags.
  
• 2002–2004 Þýðingar fyrir heimspekitímaritið Hug
  Maurizio Ferraris „Fyrirbærafræðin og Messías“, Hugur, 17. árg. 2005.
  Sara Heinämaa „Eining sálar og líkama“, Hugur, 17. árg. 2005.
  Slavoj Zizek, „Kant með (eða á móti) Sade“, Hugur, 16. árg., 2004.
  Minna Koivuniemi, „Í kóngulóarvefnum – Spinoza um hrif“, Hugur, 16. árg, 2004. Guðfríður Lilja Grétarsdóttir „Takmörk rökvísinnar – Tilfinningalíf og ímyndunarafl í uppeldi spinozískra þegna“, Hugur, 16. árg. 2004.
  Bernard Williams, „Heimspeki sem hugvísindi“, Hugur, 15. árg., 2003.
  Teresa Orozco, „Skírskotunarlistin – Heimspekileg íhlutun Gadamers í Þriðja ríkinu“, Hugur, 15. árg., 2003.
  Hans Georg Gadamer, „Maður og tunga“, Hugur, 14. árg. 2002.
  
• 2003–2004 Þýðingar fyrir afbækur Nýhil
  Slavoj Zizek, „Framvinda mjúku byltingarinnar“, Af okkur, Nýhil 2004
  Slavoj Zizek, „Íraksstríðið – hvar liggur hin raunverulega hætta?“, Af stríði, Nýhil 2003.
  Arundhati Roy „Instant-mix heimsveldislýðræði!“, Af stríði, Nýhil 2003.
  

---

KVIKMYNDAVERK

• 2006 Papagena – ferðamaður 1
  Höfundur. Heimildamynd um fáránleika löngunarinnar. 16 mín.
  
• 2003 Áróður
  Handrit og leikstjórn. Frumsýnd á hátíðinni Shorts&Docs í Reykjavík 2004. 13 mín.
  
• 2002 Annað fólk – Andere Leute – Altre Gente
  Handrit og leikstjórn. „Rannsókn á persónulegum hraða“ – kvikmynd gerð í þremur útgáfum, þar sem ljóð þriggja ólíkra skálda eru notuð með, eða í stað, tónlistar. Skáld: Veronica Raimo, frá Ítalíu, Reto Pulfer, Sviss, og ég sjálfur. 12 mín.
  
• 2001 Homo activitus
  Handrit og leikstjórn. Grínmynd um tómhyggju. 7 mín. „Mynd mánaðarins“, Bíó Reykjavík, apríl 2002.
  
• 2001 Í fremstu víglínu – stutt mynd um prest
  Handrit og leikjstórn. 15 mín. Þriðju verðlaun á Stuttmyndadögum í Reykjavík, 2001. Sýnd á RÚV.
  
• 2000 Vei! Hryðjuverk! – sjónvarpsmynd
  Handrit. Framleitt af Böðvari Bjarka Péturssyni fyrir RÚV. 25 mín.
  

---

UPPÁKOMUR

• 2006 Kviksaga – heimildamyndamiðstöð Reykjavíkurakademíunnar
  Stofnmeðlimur og hugmyndasmiður Kviksögu, sem stendur fyrir framleiðslu, sýningum og kennslu í heimildamyndagerð.
  
• 2005 La dolce fucking vita á Berlin Expo
  Á sölumessunni Berlin Expo, endurtók ég leikinn frá Danmörku, í samfloti við meðlimi Klink og Bank, lokaði mig inni í litlum klefa og las ljóð fyrir einn gest í einu.
  
• 2005 La dolce vita á Lys over Lålland
  Á listahátíðinni Lys over Lålland í Danmörku setti ég í fyrsta skipti upp ljóðlestur í sýningarrými undir yfirskriftinni La Dolce Vita – þar sem ég lokaði mig inni í litlum klefa og las ljóð fyrir einn gest í einu, þegar þeir þorðu að stíga inn.
  
• 2003 Ljóðapartí – ljóðlestraferðalag
  Nýhil lagði í ljóðlestraferðalag um Ísland 5. til 24 júlí 2003. Viðkomustaðir voru: Seyðisfjörður, Höfn í Hornafirði, Mosfellsbær, Akureyri, Sauðárkrókur, Ísafjörður og Reykjavík.
  
• 2003 Nýhilkvöld
  Fyrstu uppákomur Nýhil skipulagði ég í Versuchsstation, Berlín, haustið 2003. Fram komu Eiríkur Örn Norðdahl, meðlimir múm, ungir þýskir rithöfundar, ég sjálfur o.fl.
  
• 2000 Spakstundir, heimspekispjall
  Reglulegar uppákomur sem ég skipulagði sem formaður Soffíu, félags heimspekinema við HÍ. Fram komu, m..a., Róbert Haraldsson, Sölvi Björn Sigurðsson, Stefán Jón Hafstein, Vilhjálmur Árnason, Viðar Þorsteinsson o.fl. Kvöldin voru opin öllum. Spakstundir eru enn haldnar.
  

---

KENNSLA

• 2005-2006 Stundakennari við Kvikmyndaskóla Íslands
  Kenni kvikmyndagreiningu með Ásgrími Sverrissyni, kvikmyndagerðarmanni.
  
• 2005-2006 Stundakennari við Listaháskóla Íslands
  Kenni áfangana Útópía/Alkemía og Pólitískt myndmál á hönnunarbraut.
  
• Vor 2001 Aðstoðarkennari Erlends Jónssonar, prófessors við HÍ
  
• Vor 2000 Leiðbeinandi við leikskólann Tjarnarborg
  
• 1998–1999 Leiðbeinandi við Grunnskólann á Ísafirði
  Umsjónarkennari í 6. bekk.
  
• 1998 Leikstjóri í leikklúbbi unglinga við Grunnskólann á Ísafirði
  Settur var á svið söngleikurinn Grease.
  

---

NÁM

• 2003–2004 Cinema Studies, Kvikmyndanám við FAMU, listakademíuna í Prag
  Aðalfag: Handritsskrif. Á meðal kennara: Jean-Claude Carrière, J. Sofr, Brendan Ward, Linda Aronson, Pavel Jech, M. Bregant, Vojtechosvský og Barbara Ericsson.
  
• 2003 Kurz&Gelb, leikstjórnarnámskeið við UdK, listakademíuna í Berlín
  Leiðbeinendur voru leikstjórarnir Edward Berger og Lars Kraume.
  
• 1999–2003 B.A. gráða í Heimspeki frá Háskóla Íslands
  
• 2001-2002 Skiptinám við Humboldt og Tächnische háskólana í Berlín
  – tvær annir með styrk frá Erasmus.
  
• 2002 Þátttaka í málstofunni: Espaces d'action – espaces de perception
  við Université de Technologie, Compiègne, í Frakklandi. Sókrates-styrkþegi.
  
• 2001 Þáttaka í málstofunni: Cognitive Science and Philosophy
  við Brighton University í Bretlandi, Sókrates-styrkþegi.
  
• 1998 Stúdentspróf frá Menntaskólanum við Hamrahlíð
  Af eðlisfræðibraut.
  

---

TUNGUMÁL

Leikandi: Þýska, enska og íslenska
Nokkur: Franska og danska
Læs á: ítölsku og Norðurlandamál

Tilraun

Lykilgrein

Fréttablaðið bað mig um grein á dögunum, er að reyna að fjölga reglulegum pistlahöfundum og auka úrval skoðana. Hins vegar skilst mér að í herbúðunum hafi einhverjum þótt grein mín óþarflega mikil aukning í úrvali skoðana … jafnvel ekki ljóst að um raunverulega skoðun sé þar að ræða, og því óvíst hvort þeir kalla eftir meira. Hér er hins vegar greinin sem þeir fengu, blessaðir – þetta er lykilgrein og hana má lesa saman við hina nýútkomnu bók, Rispa jeppa:

Friðsældin framundan

Brátt verður því búið að ryðja byggð úr vegi Reykjavíkur og rýma fyrir mislægum gatnamótum. Því er rétt, áður en við brunum öll endanlega austur nýju Hringbrautina, út á Leifsstöð og burt, að athuga hver það er sem erfir land, hvaða mann landneminn hefur að geyma, ef svo má segja. Hvað eru mislæg gatnamót?

1. Mislæg gatnamót eru fullkomnun þeirrar vegagerðar sem sjálf skapar fjarlægðirnar sem hún yfirstígur. Þannig hefur verið sýnt fram á að ef göngu- og hjólabrautir kæmu í stað vega innan höfuðborgarsvæðisins styttust fjarlægðir milli húsa svo að göngufært yrði á milli enda borgarinnar á tíu mínútum. Sem er umtalsvert styttri tími en tekur að ganga yfir meðalstórt bílastæði.

2. Mislæg gatnamót birtast þar sem áður voru krossgötur. Á krossgötum mátti standa, anda, horfa til allra átta, og ákveða svo hvert leiðinni væri heitið og hefði djöfullinn eitthvað til málanna að leggja var honum það fúst og frjálst. Á mislægum gatnamótum er ekki tóm til að staldra við og tala við djöfla.

3. Einhver orðaði það eitt sinn svo að helvíti væri hinir – í öllu falli eru djöflarnir hinir. Mislæg gatnamót eru einmitt til þess gerð að enginn þurfi nokkru sinni að verða var við aðra. Mislæg gatnamót gera mögulegt að ferðast milli vinnu, heimilis og verslana án þess að staðnæmast einu sinni á rauðu ljósi meðan aðrir fara hjá. Mislæg gatnamót eru að því leyti fullkomnun og endastöð þeirrar rökvísi einkabílsins að samneyti við ókunnuga sé til trafala, óþægilegt eins og sígarettureykur, og þeir, aðrir, séu betur geymdir í sjónvarpinu.

4. Mislæg gatnamót eru yfirlýsing um endalok stjórnmála og sögu, ytri mörk línulegs tíma, og fögnuður þeirrar nýju rökvísi að til að komast til hægri skuli maður beygja til vinstri. Til að rugla ekki þá í ríminu sem gætu þurft að yfirgefa bíla sína um stundarsakir og ganga, til dæmis vegna vélarbilunar, hefur sama rökvísi nú verið heimfærð á nýja hönnun göngubrúa, sem berja má augum í Vatnsmýri – rétta leiðin yfir Hringbraut er burt frá henni.

5. Mislæg gatnamót eru manndómsvígsla, þar duga menn eða hika, tapa og drepast. Sá sem ekki tekur rétta hægribeygju á leið sinni til vinstri veit ekki fyrr en hann er lentur í Mosfellsbæ. Sú saga er raunar sögð að láti maður kylfu ráða kasti og gæti ekki að því hvar og hvenær maður beygi á gatnamótum borgarinnar endi maður undantekningalaust á bílastæðinu við Smáralind.

6. Mislæg gatnamót eru manifestó, yfirlýsing, og þau segja: það er ekki leiðin eða ferðalagið sem skiptir máli, heldur aðeins áfangastaðurinn. Aðeins áfangastaðurinn. Á leiðinni er enda bara útvarp, á áfangastaðnum verður þráðlaust net og dvd spilari.

7. Mislæg gatnamót eru sjálfsprottin, þau reisa sig sjálf í nokkurs lags spíralhreyfingu gegnum skrifræði, fjármagn og mýrlendi, án þess mannshöndin komi þar nokkurs staðar nálægt. Hafi mannshönd komið þar nálægt, til dæmis hönd gatnamálastjóra, skipulagsfræðings, hendur nefnda eða verkfræðinga, munu þeir vilja koma fleiri mislægum gatnamótum upp þar til engin leið er að rata um borgina, inn í hana eða út úr henni, svo þeir finnist aldrei, aldrei nokkurn tíma, heldur geti andað rólega einhvers staðar á milli vega. Þeir munu vita hvenær við erum farin og þeir geta um frjálst höfuð strokið, það mun birtast í fréttum.

8. Eins og gatnamótin sjá að mestu, ef ekki öllu, leyti um sig sjálf munu bílarnir vafalaust halda áfram að sprella um göturnar þegar við erum farin – og útvarpsstöðvum mun trúlega ganga ágætlega að fylla dagskrárbilin á milli auglýsinga, þó mannsskepnurnar hypji sig.

9. Það fer tvennum sögum af því hvort mislæg gatnamót voru veitt með fulltingi djöfulsins og því hafi hann svo hljótt um sig núna að fáu sé við að bæta, eða hvort hann stendur svekktur í súldinni á umferðareyju eða undir brúarsporði. Sjái hann einhver í vegkanti væri fallega gert að henda til hans brauði.

10. Heyrst hefur að íslensk verktakafyrirtæki muni brátt senda pólska starfsmenn sína til að reisa mislæg gatnamót í Írak, þar sem bensínverð er lágt, og því hægt að keyra meira. Samið hefur verið við CIA um afnot af flugvélum til að ferja starfsmennina. Það er ekki leiðin sem skiptir máli heldur áfangastaðurinn en við vitum líka öll hvert ferðinni er heitið, er það ekki?

Mannasiðir holdsins

Andinn er veikur en holdið kann sig. Eftir að geta ekki gert upp við mig hvort ég vildi taka þátt í opinberri athöfn um undirskrift samnings við Landsbankann, hinn almenna kaupanda 1300 ljóðabóka frá Nýhil, vakna ég einfaldlega fárveikur nú í morgun. Lífeðlisfræðin sér um sína, ég kýs að túlka veikindi mín út frá töfraraunsæi, líta á þau sem pólitískt eðli, örlög eða helberan dónaskap eftir því hvaðan á málið er litið. Í öllu falli held ég mig heima.

Hvurnin hefur annars lífið verið upp á síðkastið? Alveg ljómandi ágætt. Þessar fallegu bækur okkar komu út í síðustu viku. Þess utan hef ég sinnt kennslu, fyrst við Kvikmyndaskóla Íslands, síðan hönnunardeild LHÍ og hvort tveggja reynist mér hollt, hvað sem nemendum þykir.

Lífið er meira spennandi utan skóla, þó ekki væri nema vegna bókanna sem falla utan allra námsskráa. The art of seduction eftir Robert Greene hefur til dæmis, mér vitanlega, aldrei verið kennd við Háskóla Íslands. Og trúlega ekki heldur við Listaháskólann.

Helstu rannsóknaniðurstöður helgarinnar: Partíið heldur áfram hvað sem tautar og raular – Valur stendur brosandi utan við Sirkús með greinar eftir Badiou á milli handanna, Reykjavík er skemmtiferðaskip á miðju Atlantshafi og fólkið vaggar fram og til baka, reynir að stíga ölduna, ælir svo yfir borðstokkinn.

Desember er tannlæknamánuður. Ef einhver getur mælt með góðum tannlækni er ég allur eyru. Vil ekki rotna, ekki strax.